Vətən bizim varlığımızdır, fəxrimizdir, qürurumuzdur. Tariximizin hansı səhifəsini vərəqləsək, orada igid babalarımızın keçdiyi qəhrəmanlıq yollarının izinə rast gələ bilərik. Neçə-neçə qəhrəmanımız torpaqlarımızın azadlığı uğrunda canlarını fəda ediblər. Çünki yaşadığımız torpağı qorumaq üçün Vətən uğrunda mübarizə əsas şərtdir. Bu yolda canını qurban verən qəhrəmanlar heç vaxt unudulmur, əbədiliyə qovuşurlar. Vətənə sadiq olmaq, Vətəni sevmək, Vətən torpağının azadlığı və istiqlaliyyəti uğrunda vuruşmaq - budur vətənpərvərlik.
Azərbaycan Respublikasının Prezidenti İlham Əliyevin həyata keçirtdiyi gənclər siyasətinin, gənclərə göstərilən diqqət və qayğının əsasında ölkə üçün layiqli vətəndaş və sağlam nəslin yetişdirilməsi dayanır. Eyni zamanda ölkə başçısının ordu quruculuğu sahəsində apardığı ardıcıl və məqsədyönlü siyasət nəticəsində Silahlı Qüvvələrimizin hərbi-texniki təchizat səviyyəsi, nizam-intizamı və döyüş ruhu kifayət qədər yüksəkdir. Bu gün Silahlı Qüvvələrimiz dünya reytinqində 50-ci pillədə qərarlaşır. Dağlıq Qarabağ münaqişəsinin həlli və ərazi bütövlüyümüzün bərpası Azərbaycan dövlətinin prioritet hədəfidir. Biz dəfələrlə düşmənə ordumuzun gücünü göstərmişik. Bunu istər 2016-cı il aprel əməliyyatı, istərsə də 2018-ci il Naxçıvan əməliyyatında sübut etdik. Belə ki, aprel döyüşləri nəticəsində əkshücuma keçən hissələrimiz mühüm mövqelərə sahib oldu. Lələtəpə kimi yüksəklik alındı. Nəticədə düşməndən azad edilən Cəbrayıl rayonunun Cocuq Mərcanlı kəndinin təhlükəsizliyi təmin olundu. Aprel döyüşləri nəticəsində Füzuli, Cəbrayıl və Ağdərə rayonlarının işğaldan azad edilmiş ərazilərində bu gün Azərbaycan bayrağı dalğalanır. Aprel qələbəsi bir daha sübut etdi ki, ordumuz torpaqlarımızı işğaldan azad etməyə qadirdir.
2018-ci ildə aparılan uğurlu əməliyyat nəticəsində Şərur rayonunun işğal altında olan Günnüt kəndi və ətraf ərazilər düşmən tapdağından azad edildi, 11 min hektar torpağa ordumuzun nəzarəti təmin olundu. Nəticədə, Əlahiddə Ümumqoşun Ordu düşmənin mühüm strateji yollarına nəzarəti ələ aldı, onun üzərində böyük üstünlük qazandı.
2020-ci il 12 iyul tarixində isə mənfur erməni ordusu atəşkəs rejimini pozaraq dövlət sərhədinin Tovuz rayonu istiqamətində Azərbaycan silahlı qüvvələrini iriçarplı silahlardan atəşə tutmuşdular. İyul döyüşündə Azərbaycan ordusu öz gücünü bir daha göstərərək düşməni cavab atəşi ilə susdurdu. Düşmən 100 nəfərə yaxın canlı qüvvəsini və texnikasını itirdi.
Heç bir qələbə itkisiz ötüşmür. Müharibədə döyüş də var, şəhidlik də var. Torpaqlarımızın azadlığı, dövlət sərhədlərimizin pozulmaması, suverenliyimiz uğrunda canlarından keçən general-mayor Polad Həşimov, polkovnik İlqar Mirzəyev, Mübariz İbrahimov, Fərid Əhmədov, Vüqar Sadıqov, Rəşad Mahmudov, İlqar Zeynallı və bu kimi yüzlərlə qəhrəman oğullarımızın yolunun davamçısı olmaq gənclərimizin ən böyük arzusudur. İyul döyüşündən sonra küçələrə axışan, Qarabağa azadlıq şüarları səsləndirən və Ali Baş Komandanın çağırısı ilə 55.130-dan çox vətəndaşın Səfərbərlik və Hərbi Xidmətə Çağırış üzrə Dövlət Xidmətində qeydiyyatdan keçməsi və müraciətlərin bu gün də davam etməsi gənclər arasında vətənpərvərlik duyğusunun artmasının ən böyük göstəricisidir. Həttə ölkənin 43 siyasi partiyası birgə, 4 siyasi partiyası isə ayrılıqda bəyanat verərək, erməni təxribatına qarşı mübarizədə Ali Baş Komandanın ətrafında birləşdiyini vurğulayıb.
Ermənistan hökumətinin iyul təxribatı zamanı ordumuzun generalı döyüşlərdə əsgərlərimizin yanında idi, onlarla çiyin-çiyinə düşmənə qarşı vuruşurdu. Bəli, əgər bu gün hansısa bir dövlətin generalı düşmənlə sərhəddə öz əsgərləri ilə çiyin-çiyinə vuruşursa demək ki, o ordu yenilməz, məğlubedilməzdir.
Ali Baş Komandan İlham Əliyev vətən uğrunda canlarını verən qəhrəmanlarımızı unutmur, onların, ailələrinin qayğısına qalır və onların qəhrəmanlığını yüksək qiymətləndirir. İyulun 15-də Prezident İlham Əliyev döyüş zamanı müdafiənin ön xəttində olarkən qəhrəmancasına şəhid olmuş general-mayor Polad Həşimovun anası Səmayə xanım və polkovnik İlqar Mirzəyevin oğlu Elvin ilə telefonla danışıb. Dövlətimizin başçısı şəhidlərin ailə üzvlərinə dərin hüznlə başsağlığı verib, şəhidlərə Allahdan rəhmət və onlara səbr diləyib.
Prezident İlham Əliyev general Polad Həşimovun və polkovnik İlqar Mirzəyevin ailəsinə ev verib.
Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın tapşırığına əsasən Fondun nümayəndələri Sumqayıt şəhərində general-mayor Polad Həşimovun və Bakı şəhərində polkovnik İlqar Mirzəyevin ailələrini ziyarət ediblər. Fondun nümayəndələri Ağstafa, Tovuz, Qazax, İsmayıllı, Biləsuvar və Masallı rayonlarında olaraq şəhid ailələrinə baş çəkəcəklər. Tovuz rayonu istiqamətlərdə şəhid olan hərbçilərin ailə üzvlərinin bütün qayğılarının Mehriban Əliyevanın tapşırığına əsasən daim Fondun nəzarətində olacağı bildirilib. Görülən bu tədbirlər bir daha sübut edir ki, vətən uğrunda, torpaqlarımızın azadlığı uğrunda qəhrəmancasına savaşaraq canlarını fəda edən şəhidlərimizin ailələri hər zaman dövlət başçısının xüsusi diqqət və qayğısındadır.
Təbii olaraq baş verən son hadisələr beynəlxalq aləmdə də müzakirə obyektinə çevrildi. Bir çox dövlətlərdən Azərbaycana dəstək gəldi. Türkiyə Cümhuriyyəti Azərbaycanı tək buraxmadı və təbii ki, Azərbaycana dəstək nümayiş etdirən ilk ölkə Türkiyə oldu. Türkiyənin Prezidenti Rəcəb Tayyib Ərdoğanın çıxışı Azərbaycana qardaş dəstəyi olmaqla yanaşı, həm də düşmənlərə mesaj oldu. O çıxışı zamanı dost və qardaş Azərbaycana qarşı Ermənistan tərəfdən törədilən hücumu şiddətlə qınadığını dilə gətirib: “Ermənistan ağlını başına yığsın, Azərbaycan tək deyil. Biz Türkiyə Cümhuriyyəti və türk milləti olaraq bütün imkanlarımızla Azərbaycanın yanındayıq. Azərbaycanın ərazi bütövlüyünün qorunmasına əlimizdən gələn dəstəyi verəcəyik. Biz demişik ki, Azərbaycan Dağlıq Qarabağ münaqişəsi ilə bağlı hansı həll yolunu seçəcəksə, biz Azərbaycanın yanında olacağıq. Bu həssas bir cümlədir. Bunu bilərəkdən dedim”.
Xaricdə yaşayan soydaşlarımız da Prezident İlham Əliyevin yanındadır və onu dəstəkləyir. Dünyanın bir çox şəhərində yaşayan soydaşlarımız dinc mitinqlər keçirərək «Qarabağ Azərbaycanındır», «Erməni terrorizminə son», «Qarabağa azadlıq» və sair bu kimi şüarlar səsləndirərək birlik nümayiş etdirmişlər.
Fehruzzadə Xatirə
Nəsimi rayon təhsil işçisi,
