Yeni Azərbaycan Partiyası (YAP) Gənclər Birliyi sahibkarlıq fəaliyyəti ilə məşğul olmaq istəyən gənclər üçün yeni layihə həyata keçirməyə başlayıb.
Birlikdən Mövqe.az-a verilən məlumata görə, bu layihə Gənclərin İntellektual İnkişafına Yardım İctimai Birliyi ilə birgə və "IB Club"un tərəfdaşlığı ilə reallaşır.
Bu gün Monolit Plazada "Youth in Business - Milli Biznes Çempionatı" layihəsinin açılışı mərasimi keçirilib.
Açılış tədbirində YAP icra katibinin müavini, millət vəkili Mübariz Qurbanlı, "İki Sahil" qəzetinin baş redaktoru Vüqar Rəhimzadə, YAP Gənclər Birliyinin sədri Seymur Orucov, Azərbaycan Prezidenti Adminstrasiyasının əməkdaşı Vüsal Quliyev, Azərbaycan Prezidenti yanında Gənclər Fondunun əməkdaşı Orxan Ərəbov, ATGTİ-nin sədri Şahin İsmayılov və digər şəxslər iştirak ediblər.
Layihənin ideya müəllifi olan Şəmsi Bayramzadə əvvəlcə layihə haqqında geniş məlumat verib. O bildirib ki, "Youth in Business - Milli Biznes Çempionatı" adlanan bu layihənin əsas məqsədi gənclərin biznes və sahibkarlıq biliklərinə yiyələnməsinə nail olmaqdır.
Layihə ilk dəfə 2012-ci ildə reallaşıb və bu il ikincisi həyata keçirilir. Layihəyə universitetlər üzrə təlimçilər və təlimçi olmaq iddiasında olan gənclər cəlb edilib.
13 ali təhsil ocağı üzrə 16 komanda çempionatda hazırladıqları biznes planları təqdim edəcəklər. Mükafatlar isə qalib komanda üçün 500 AZN, 2-ci yer üçün 200 AZN, 3-cü yer üçün isə 100 AZN, eyni zamanda, bəyənilən biznes planın reallaşdırılmasından ibarətdir.
Tədbirdə çıxış edən Mübariz Qurbanlı YAP Gənclər Birliyinin bu layihəsini yüksək dəyərləndirib və gənclər üçün daha çox faydalı olacağını bildirib, Milli Biznes Çempionatının özləmizdə formalaşan bazar iqtisadiyyatı mühitində gənclər üçün yeni imkanlar açacağına ümid etdiyini deyib.
YAP Gənclər Birliyinin sədri Seymur Orucov çıxışında gəncləri bu tipli layihələrdə aktiv olmağa çağırıb.
Çıxış edən digər şəxslər də layihə ilə bağlı münasibətlərini bildirib və layihənin işinə uğurlar arzulayıblar.
Açılış tədbirində gənc komandalardan biri biznes layihəsini təqdim edib, layihə hər kəsin böyük marağına səbəb olub.
