Azərbaycan son aylar hüquqi müstəvidə Ermənistan üzərində qələblərinin sayının artırır. Belə ki, artıq Almaniya Ermənistanı işğalçı ölkə kimi tanıyıb. Almaniya Federal hökumətinin dünyada hüquq müdafiəsi siyasəti üzrə 11-ci hesabatında bildirilir ki, Ermənistan 1994-cü ildə atəşkəs sazişi imzalandığı andan işğal etdiyi, beynəlxalq hüquqa əsasən Azərbaycana məxsus olan ərazilərdə, o cümlədən də Dağlıq Qarabağda insan hüquqlarının vəziyyətinə görə məsuliyyət daşıyır. Bundan başqa, Strasburqda yerləşən Avropa İnsan Hüquqları Məhkəməsinin Böyük Palatasının "Çıraqov və digərləri Ermənistana qarşı" işi ilə bağlı qərarını şərh edərkən Böyük Britaniya parlamentinin üzvü Stefen Hepbörn da Azərbaycanın suveren ərazisinin Ermənistan tərəfindən işğalı olunduğunu bildirib. ATƏT Parlament Assambleyası isə b ugünlərdə azərbaycanlıların işğal olunmuş ərazilərə qayıtmaq hüququnu təsdiq edib. ATƏT PA-nın Helsinki sessiyasının nəticələri üzrə qəbul olunan yekun bəyannamədə deyilir: "Bəyannamə münaqişələr nəticəsində qaçqın və məcburi köçkün olmuş Azərbaycan, Gürcüstan, Moldova və Ukrayna əhalisinin təhlükəsizliyin və şərəf və ləyaqətə hörmətin təmin edilməsi şərti ilə evlərinə qayıtmasının ayrılmaz hüquqları olduğunu bir daha təsdiq edir. Həmçinin bu fəaliyyətlərin həyata keçirilməsi üçün lazımi şəraitlərin yaradılmasının zəruriliyi vurğulanır". Bəyannamədə dövlətlərin ərazi bütövlüyünün toxunulmazlığı məsələsi də vurğulanır.
Millət vəkili Fərəc Quliyev bildirir ki, Avropadakı müəyyən dövlətlərin həqiqəti ifadə etmələri normal haldır, təəccüb doğurmamalıdır: "Çünki, bu dövlətlər BMT-nin üzvüdürlər. Hansı ki, BMT-nin də Qarabağla bağlı 4 qətnaməsi var. Həmin qətnamələrdə Ermənistanın işğalçı olduğu göstərilib. Həmin dövlətlər də bu qətnamələrə səs veriblər. Amma son zamanlar onlar tərəfindən Azərbaycana qarşı biganəlik var. İndi isə həqiqətləri əks etdirən fikirləri eşidəndə dünya dövlətlərinin öz siyasətlərinə redaktə etmək məcburiyyətində olduqlarını görürük. Çünki, Ermənistanın Rusiyanın forpostu olduğunu hər kəs anlayır. Eyni zamanda yeni dünya düzəninə mane olan dövlət kimi tanınır. Azərbaycan isə fərqli mövqe tutur. Görünür, Azərbaycan həm də Avropa Oyunlarının təqdimatında özümüzü tolerant ölkə kimi göstərə bildi. Bu mənada həmin dövlətlərin həqiqətləri əks etdirən bəyanatlarla çıxış etməsi təqdirolunandır. Əlbəttə ki, bizdən də adekvat münasibət görəcəklər".
Təhlükəsizlik və Strateji Araşdırmalar Mərkəzinin sədri, politoloq Hatəm Cabbarlı "Mövqe"yə bildirdi ki, 20 ildən çoxdur ki, bir Avropa dövləti və ya ciddi beynəlxalq təşkilatlar Ermənistanı açıq şəkildə işğalçı dövlət olaraq tanınamışdı: "Əlbəttə, bu dövlətlər və beynəlxalq təşkilatlar müəyyən sənədlərdə Ermənistanı qınayan, dolayısı ilə Ermənistanı ittiham edən ifadələr işlədirdilər. Amma heç bir zaman açıq şəkildə "Ermənistan Azərbaycan torpaqlarını işğal edib", ifadəsi səsləndirilmirdilər. Son zamanlarda həm regionda, həm də beynəlxalq aləmdə yaşanan siyasi hadisələrə paralel olaraq, bəzi Avropa dövlətləri Ermənistanın Azərbaycanın torpaqlarını işğal etməsi faktını artıq görür və bunun hüquqi qiymətini verir. Son nümunəsini Almaniyada görürük. Almaniya Ermənistanın Azərbaycanın torpaqlarını işğal etdiyi faktını təsdiqlədi. Eyni zamanda İngiltərə nümyəndəsinin də bu barədə açıq fikir bildirməsi Azərbaycan dövlətinin maraqları baxımından olduqca uğurlu bir hadisədir.
Almaniyanın Ermənistanı işğalçı dövlət kimi tanıması Azərbaycan xarici siyasətinin uğurudur və böyük əhəmiyyət kəsb edir. Bu anda ATƏT həmsədrlərinin oxşar ədalətli addım atmamaları düşündürücüdür. Almaniya Minks qrupunun üzvü deyil. Azərbaycanın gözləntisi isə məhz həmsədr dövlətlərdəndir. Bu cür qərarların verilməsi Ukrayna hadisələrindən sonra Rusiya-Ermənistan münasibətlərində axtarmaq lazımdır. Bunun ardının gəlməsi üçün ciddi işlər görülməlidir".
