Həcc ziyarətində korona virusu təhlükəsi-Özəl

Müqəddəs Payızov: "Səudiyyə Ərəbistanın Səhiyyə Nazirliyindən bizə bu barədə təlimat gəlməyib" Səudiyyə Ərəbistanında korona virusundan ölənlərin olması Həcc ziyarəti yaxınlaşdıqca narahatlıqları artırır. Bu il Həcc ziyarətinə getmək üçün qeydiyyatdan keçənlər bu virusa yoluxacaqları ilə bağlı ciddi narahatlıq keçirirlər. Bu il Azərbaycandan 3600 zəvvarın Həccə getməsi nəzərdə tutulub. Bəs görəsən Səudiyyə Ərəbistanında yayılmış virusla bağlı zəvvarlarımızın sağlamlığına təhlükə yarana bilərmi? Qafqaz Müsəlmanları İdarəsinin (QMİ) Beynəlxalq əlaqələr şöbəsinin müdiri Müqəddəs Payızov Movqe.az-a açıqlamasında bildirdi ki, zəvvarlarımızın narahatçılığına qəti əsas yoxdur: "Çünki, həmişə bu ölkədə təhlükəli virus yayıldıqda Səudiyyə Ərəbistanının Səhiyyə Nazirliyi xəbərdarlıq edir. Bizə təlimatlat göndərirlər ki, zəvvarlar bu viruslara qarşı peyvənd olunsunlar. Bu il bizə bu ölkənin Səhiyyə Nazirliyindən hər hansı xəbərdarlıq təlimatı daxil olmayıb. Ona görə də, narahatçılığa əsas yoxdur". M. Payızov zəvvarların yalnız müəyyən qrip növlərinə qarşı peyvənd edildiyini, xəstəliklərinin yoxlanıldığını söyləyib. Qeyd edək ki, Səudiyyə Ərəbistanı Səhiyyə Nazirliyi ölkədə korona virusundan ölənlərin sayının 28-ə çatdığını bəyan etmişdi. Bununla bağlı açıqlama verən Ümumdünya Səhiyyə Təşkilatının səlahiyyətliləri isə virusun yayılma sürətindən narahat olduqlarını bildiriblər. Qeyd edək ki, virusa qarşı qoruyucu peyvəndlər mövcud deyil və xəstəliyin müalicəsi yoxdur.