Avstriyanın Lins şəhərinin yaxınlığında, Sankt Georgen der Qusen şəhərciyində İkinci Dünya Müharibəsi illərində inşa edilmiş yeraltı tunellər kompleksi aşkarlanıb.

Həmin bölgədə normadan artıq radioaktiv fon qeydə alınandan sonra kompleks təsadüfən tapılıb.

Movqe.Az European-a istinadən bildirir ki, obyektdə qazıntı işlərinə rəhbərlik edən Andreas Sulzserin dediyinə görə, nasist Almaniyası məhz burada atom bombasının hazırlanması ilə bağlı tədqiqat işləri aparıb. Tunellər kompleksinə giriş partladılıb, torpaq və qranit lövhələrlə örtülüb.

Hələlik tunel kompleksinin kiçik hissəsi tədqiq olunub.

Obyektin inşasına 1944-cü il yanvarın 2-də SS generalı, faşist Almaniyasında raket proqramına cavabdeh olan general Hans Gamperin rəhbərliyi ilə başlanmışdı.

Tunelləri yaxınlıqdakı Mauthauzen konsentrasiya düşərgəsindəki əsirlər tikirdilər.

Tikintidə 40 minədək əsir işlədilib ki, onlardan kimsə sağ qalmayıb.

Alimlər hesab edirlər ki, tunellər kompleksində faşistlərin radioaktiv materialları qala bilər.