"Özümdən sonra davamçım yalnız özüməm" -Səyavuş Aslanın son müsahibəsi
27 İyun 2013 15:12 (UTC+04:00)
Müsahibəyə çətinliklə razılaşdı. Bütün yolu "onu səhnədəki
kimi görə biləcəyəmmi?" – deyə düşünürdüm. Qapı açılanda korifey
sənətkar otaqdan boylandı.Qeyri-ixtiyarı içimdən onu alqışlamaq
keçdi. İlk təəssürat belə idi. İki ildən çoxdur səhhətində ciddi
problemlər yaşayan Xalq artisti Səyavuş Aslanla elə bu barədə
danışırıq:
– Səyavuş müəllim, necəsiniz?
– Yaxşıyam. Özümü çox yaxşı hiss edirəm. Sözün düzü, indi çox
həyəcanlıyam. Nəyə görə? Çünki çox ağır bir dönəm yaşamışam, bu
dərəcədə çətin günlər keçirdiyimi bilmirdim, indi bu barədə mənə
deyəndə çox həyəcanlanıram. O günlərin necə keçdiyini xatırlamıram.
Sevinirəm ki, indi sizin vasitənizlə yenidən tamaşaçılarımla
görüşəcəyəm.
– Çətin günlərin öhdəsindən necə gəldiniz?
– Artıq heç bir çətin günü xatırlamaq istəmirəm, hər şey geridə
qaldı. Məni necə görmüsünüzsə yenə də eləyəm. Çalışacam ki, hər
zamankı kimi olum.
– Gününüzü necə keçirirsiniz?
– Mənim o qədər qohum-əqrəbam var ki, nə televiziyaya baxmağa, nə
də gəzməyə vaxtım olur (gülür). Onlar həmişə çalışırlar ki, yanıma
gəlib-getsinlər, məni darıxmağa, tək qalmağa qoymurlar. Dost-tanış,
qonum-qonşu tez-tez gəlib-gedirlər.
– Sizi həmişə şəhəri, xüsusən bulvarı piyada gəzən
görmüşük. Bu ənənəni davam etdirirsinizmi?
– Gəzməyi sevirdim. Amma indi evdəkilər çox gəzməyə qoymurlar,
ehtiyat edirlər. Qoysalar yenə də gedib gəzərəm (gülür). Buna
baxmayaraq yenə şəhərə çıxıram.
– Sənət yoldaşlarınızdan yanınıza gələn, zəng vuran
varmı?
– Var. Ümumiyyətlə, çox adam yanıma gəlir.
Bu məqamda S.Aslanın baxıcısı olan gənc qadın söhbətə müdaxilə
edib, 7 aydır sənətkara qulluq etdiyini, lakin bu müddət ərzində
aktyorlardan heç kimin onun yanına gəlmədiyini dedi.
Sənətkar isə ona acıqlanaraq "gəlirlər, sadəcə olaraq sən
aktyorları tanımırsan", – deyə etirazını bildirdi...
– Teatra qayıtsaydınız yenidən hansı tamaşada oynamaq
istərdiniz?
– Hamısında. Bütün tamaşalarım üçün darıxmışam. Gərək tamaşalar
arasında ayrı-seçkilik salmayasan.
– Ən sevimli tamaşanız və rolunuz hansı olub?
– Camaat sevən tamaşaları mən də sevmişəm. Onlar sevib gəliblər,
mən də sevə-sevə oynamışam. Amma təəssüf ki, indi yaşa dolmuşam,
artıq o cür ifa edə bilmərəm. Səhnədə bütün istəklərimə nail
olmuşam. Necə nail olmuşam onu artıq tamaşaçılar deyə bilər.
– Səhnədə ən sevimli tərəf-müqabiliniz kim
olub?
– Demək olar ki, aktyorların çoxu ilə tərəf-müqabili olmuşam,
onların arasında istədiyim insanlar da olub, istəmədiyim də, amma
səhnədə hər şeyi unutmuşam, heç birinə fərq qoymamışam.
– Özünüzdən sonra kimi davamçınız olaraq
görürsünüz?
– Özümdən sonra davamçım yalnız özüməm. Özümü yalnız özümə
bənzədirəm.
– Sənətə gələndə bu qədər seviləcəyinizə və tanınacağınıza
inanırdınız?
– Bəli. Çünki bu peşəni sevib gəlmişəm, gərək sənəti sevəsən.
İstəyinə nail olmaq üçün çalışmaq lazımdır.
– Sənətə gələndə ən böyük arzunuz nə idi?
– Sənətə gələndə ən böyük arzum alqış qazanmaq və sevilmək idi.
İndi deyə bilmərəm arzuma nə dərəcədə çatdım.
– Teatrdan ayrılandan sonra tamaşalara gedib
baxırdınız?
– Öz tamaşam olmasa da, həmişə teatra gedib tamaşalara baxmışam.
İndi də teatra getmək, tamaşalara baxmaq istəyirəm, amma elə halım
yoxdur ki, özüm tək gedim.
– Azərbaycan teatrına neçə qiymət verərsiniz?
– Teatra qiymət verməzlər, teatr gərək özü o qiyməti alsın. Hər bir
aktyorun öz məqamı, öz dövrü olub. Biz də vaxtımızda çox
sevilmişik. Vaxtında çox insanlar mənimlə oturub-durub, danışmaq
istəyib. İndi kənardan teatra baxanda qiymət verə bilmirəm. Çox
çətindir.
– O vaxtkı aktyor yoldaşlarınızdan kimləri
xatırlayırsınız?
– Hamısını, daha çox da Nəsibə Zeynalova yadıma düşür.
– Musiqili Komediya və Akademik Milli Dram Teatrında
çalışmısınız. Ən doğma kollektiv hansı olub?
– Hər ikisi mənim üçün doğmadır, onları heç vaxt bir-birindən
ayırmamışam, onlar məni sevib, mən də onları.
– Ən böyük arzunuz nədir?
– İstədiyim vaxt harasa gedib gəzmək. Səhhətimin yaxşı olması.
– Kiməsə demək istədiyiniz, ürəyinizdə qalan sözünüz
varmı?
– Yox, hər kəsə vaxtında hər şeyi demişəm. İstədiyim odur ki, hər
kəs öz istəyinin arxasınca getsin. Ürəyimdən keçən odur ki, kimin
ürəyindən nə keçirsə, Allah onu yerinə yetirsin.
"Baku Post" qəzeti