Azərbaycanla Niderland miqrasiya sahəsində “dəyirmi masa” keçirib
26 Aprel 2014 10:00 (UTC+04:00)
Azərbaycan Respublikasının Niderland Krallığındakı səfirliyində
Dövlət Miqrasiya Xidmətinin (DMX) rəisi Firudin Nəbiyevin, bu
ölkənin Repatriasiya və Geri Qaytarma Xidmətinin baş direktoru
xanım Rodia Maasın rəhbərlik etdikləri nümayəndə heyətlərinin
iştirakı ilə "dəyirmi masa" keçirilib.
Movqe.az Azərtac-a istinadən xəbər verir ki , səfirlikdən verilən
məlumata görə, miqrasiya sahəsində əməkdaşlıq mövzusuna həsr
olunmuş tədbiri açan səfir Mir-Həmzə Əfəndiyev Azərbaycan ilə
Niderland arasında münasibətlərin davamlı inkişafda olduğunu
vurğulayıb. Diplomat bu ilin yanvarında Davosda Azərbaycan
Prezidenti İlham Əliyevin Niderlandın Baş naziri Mark Rutte ilə
görüşünün, dövlətimizin başçısının cari ilin martında Niderlanda
işgüzar səfərinin, eləcə də Krallığın xarici işlər naziri Frans
Timmermansın respublikamıza ilk rəsmi səfərinin, o cümlədən
ölkələrimiz arasında təşkil olunan biznes forumların və yüksək
səviyyəli digər tədbirlərin münasibətlərimizin inkişafına mühüm
töhfə verdiyini deyib.
Niderlandın Repatriasiya və Geri Qaytarma Xidməti ilə səfirlik
arasında yüksək səviyyəli əməkdaşlığın mövcudluğunu diqqətə
çatdıran diplomat əlaqələrimizin daha da inkişafında Krallığın
maraqlı olduğunu bildirib. Həmçinin DMX-nin rəisi Firudin Nəbiyevin
Niderlanda səfəri çərçivəsində keçirilən görüşlərin bu sahədə
əməkdaşlığın inkişafına töhfə verəcəyinə əminlik ifadə edilib.
Azərbaycan ilə Niderland arasında miqrasiya sahəsində əməkdaşlığın
ikitərəfli münasibətlərdə mühüm əhəmiyyət daşıdığını bildirən
Firudin Nəbiyev səfər çərçivəsində keçirilmiş görüşlərin məhsuldar
olduğunu söyləyib. Xidmət rəisi, həmçinin qeyd edib ki, sürətli
sosial-iqtisadi inkişafla yanaşı, energetika və nəqliyyat
sahələrində beynəlxalq əhəmiyyətli layihələrin reallaşdırılması,
habelə Azərbaycanın əlverişli geosiyasi mövqeyi ölkəmizdə miqrasiya
proseslərinin intensivləşməsinə gətirib çıxarıb. Nəticədə
Azərbaycan miqrasiya nöqteyi-nəzərindən mənşə ölkədən təyinat
ölkəsinə çevrilib.
Daha sonra tərəflər Avropa İttifaqı ilə birgə həyata keçirilən
Tvinninq layihəsinin növbəti mərhələsi, bu sahədə ölkələrimiz
arasında əməkdaşlığın daha da dərinləşdirilməsi, eləcə də
Azərbaycan nümayəndə heyətinin səfəri çərçivəsində keçirilən vacib
görüşlərin nəticələri ətrafında fikir mübadiləsi aparıblar. Qeyd
olunub ki, Azərbaycan ilə Niderland arasında miqrasiya sahəsində
əməkdaşlıq yüksək səviyyədə davam etməkdədir. Bu baxımdan qabaqcıl
təcrübənin öyrənilərək müvafiq qaydada tətbiqi xüsusi əhəmiyyət
kəsb edir.
Rodia Maas deyib ki, ölkələrimiz arasında miqrasiya sahəsində
əməkdaşlıq nümunəvi xarakter daşıyır. Bu səbəbdən miqrasiya
sisteminin təkmilləşdirilməsi, ikitərəfli və çoxtərəfli əsasda
beynəlxalq müqavilələrin bağlanması vasitəsilə digər ölkələrlə
qarşılıqlı şəkildə miqrasiya siyasətinin müvafiq aspektlərinin
əlaqələndirilməsi vacib məsələyə çevrilib.
"Dəyirmi masa"da birgə əməkdaşlığın perspektivləri barədə fikir
mübadiləsi aparılıb, qarşılıqlı əlaqələrə töhfə verməsi baxımından
belə görüşlərin davamlı olmasının vacibliyi vurğulanıb.