Ölkə üzrə məktəbəqədər təhsil icbari olacaq-Özəl

14 Avqust 2015 10:50 (UTC+04:00)
Azərbaycanda yaxın gələcəkdə  məktəbəqədər hazırlıq icbari olacaq. Bu barədə Movqe.az-a açıqlamasında Təhsil Problemləri İnstitutunun Məktəbəqədər Təhsilin Kurikulumu şöbəsinin rəhbəri Laləzar Cəfərova məlumat verib. L. Cəfərova bildirib ki, ölkədə uşaq bağçalarının sayı məktəbyaşlı uşaqların sayı ilə tərs-mütənasib olduğundan yaxın gələcəkdə bütün məktəblərdə məktəbəqədər hazırlıq aparılacaq: " Hələki 89 məktəbdə eksperiment aparılıb. Yaxın gələcəkdə respublika üzrə məktəbəqədər hazırlığın icbari olması ilə bağlı iş aparılır. Uşaq bağçalarının sayı az olduğundan məktəbyaşlı uşaqların hamısı bağçalarda məktəbəqədər hazırlıq keçə bilmirlər. Ölkə başçısı tərəfindən təsdiqlənən "Azərbaycan Respublikasında təhsilin inkişafı üzrə Dövlət Strategiyası"nın həyata keçirilməsi ilə bağlı Fəaliyyət Planı"nda nəzərdə tutulub ki,  gələn ildən etibarən 2018-ci ilədək birillik icbari məktəbəhazırlıq təhsilinin təmin olunması üzrə icra mexanizminin hazırlansın. Artıq 89 məktəbdə məktəbyaşlı uşaqların məktəbəqədər hazırlığı aparılıb. Yaxın gələcəkdə bu, respublika üzrə bütün ümumtəhsil müəssisələrini əhatə edəcək".
Qeyd edək ki, "Azərbaycan Respublikasında təhsilin inkişafı üzrə Dövlət Strategiyası"nda 2015-2016-ci illərdə erkən yaşlı uşaqların məktəbəqədər təhsillə əhatəsinin 90 faiz səviyyəsinə çatdırılmasını nəzərdə tutan məktəbəqədər təhsilin inkişafı üzrə dövlət proqramının hazırlanması öz əksini tapıb. Məktəbəqədər təhsil müəssisələrinin yaradılması, onların fəaliyyətinin stimullaşdırılması üzrə dövlət proqramı təsdiq ediləcək.Uşaqların erkən yaş dövründə inkişafının səmərəli təhsil modelinə əsaslanan standartlar və kurikulumlar hazırlanacaq. L. Cəfərova bildirib ki, artıq məktəbəqədər təhsil üzrə milli məzmun standartları hazırlanaraq pilot şəkildə tətbiqinə başlanılıb.