Avtomobillərdə tapılmayan dərman qutuları…
26 Noyabr 2012 18:45 (UTC+04:00)
Hər gün xeyli sayda avtomobil qəzasının olması haqqında
xəbərləri hər birimiz eşidir və ürək ağrısı ilə bunu qarşılayırıq.
Araşdırmalar isə göstərir ki, yol-nəqliyyat hadisələrində ölüm
hallarının çox olmasının səbəblərindən biri də
avtomobillərdə dərman qutusunun olmaması və ilkin tibbi
yardımın göstərilməməsidir. Nəqliyyat vasitələrində dərman
qutusunun olması vacibdir. Amma çox böyük təəssüf hissi ilə qeyd
edək ki, sürücülərimizin bir çoxunun avtomobilində hələ də
dərman qutusu yoxdur.
Bəs bu gün belə hallara qarşı hansı tədbirlər görülür?
Bakı şəhər Dövlət Yol Polisi İdarəsinin Yol Hərəkətinin
Təhlükəsizliyinin Təbliği və İctimai qurumlarla Əlaqə bölməsinin
rəisi, polis polkovnik-leytenantı Vaqif Əsədov məsələ ilə bağlı
Mövqe.Az saytına aşağıdakıları bildirib: "İstismar olunan nəqliyyat
vasitəsində xüsusi komplekləşdirilmiş dərman qutuları olmalıdır.
Əks halda bu, qanunun tələbinin pozulması hesab olunur və
avtomobilləri idarə edən sürücülər məsuliyyətə cəlb edilir. İlin
əvvəlindən indiyədək Bakı şəhəri üzrə yol hərəkətində
təhlükəsizliyin təmin edilməsi məqsədi ilə yol polisləri tərəfindən
keçirilən tədbirlər zamanı 200 mindən artıq sürücü saxlanılaraq
inzibati qaydada məsuliyyətə cəlb edilib ki, 100-dən artıq sürücüyə
tətbiq edilən inzibati protokol məhz idarə olunan nəqliyyat
vasitəsində xüsusi komplekləşdirilmiş dərman qutularının olmaması
ilə bağlıdır. Bundan başqa məlumat üçün bildirirəm ki,
avtonəqliyyat vasitəsi texniki baxışdan keçirilərkən mütləq bu
göstəricilər nəzərə alınır. Yəni dərman qutularının olmasına,
dərmanların köhnə olmamasına, eyni zamanda yanğınsöndürən ilə
təchiz edilməsinə diqqət yetirilir. Bunlar olduqda avtomobillər
texniki baxışdan keçirilir. Dərman qutularının olmaması məsələsi
ilə bağlı tədbirlər keçirilir. Tədbirlər keçirilməsə belə mən
bu xüsusda sürücülər arasında təbliğatın aparılmasına xüsusi önəm
verirəm. Yol polislərinin bu tədbirləri keçirib-keçirməməsindən
məsindən asılı olmayaraq, hər bir sürücü qanunun tələbini yerinə
yetirməklə öz avtomobillərini dərman qutuları ilə təmin etməlidir.
Qanunun tələbini pozmuş sürücüyə səlahiyyəti olan şəxslərin tərtib
etdiyi inzibati protokola uyğun cərimə məbləği təyin olunur".
Sürücülər niyə avtomobillərə dərman qutularının qoyulmasında
maraqlı deyillər?
Sosioloq Əhməd Qəşəmoğlu mövzu ilə bağlı Mövqe.Az saytına
bildirib: "Birincisi, bizim sürücülər ona görə bundan yayınırlar
ki, onların əksəriyyətinin bu barədə təsəvvürü yoxdur. Dərman
qutusu nəyə lazımdır, nəyə yararlıdır? Bu haqda demək olar
anlayışları çox azdır. Profissional sürücülər bu haqda kifayət
qədər məlumatlıdırlar. Bizim sürücülərin isə əksəriyyəti
tez-tələsik sürücülük vəsiqəsi alıb maşın sürməyə həvəsi olan
insanlardır. Onların maşında qoyulan dərman qutusunun nə qədər
lazımlı olması haqqında təsəvvürü yoxdur. Ona bəzək vasitəsi
kimi baxırlar. İkincisi bu işin təşkili yüksək səviyyədə deyil.
Dövlət yol polisi tərəfindən buna nəzarət edilməlidir, tələblər
qoyulmalıdır.
Sürücülər arasında maarifləndirmə işinin də aparılması lazımdır.
Sürücüləri yolda saxlayıb soruşaq ki, qəza baş verərsə dərman
qutularının içərisində olan ləvazimatlardan nə cür istifadə
edəcəksiz, buna cavab verə bilməyəcəklər. Bu sahədə maarifləndirmə
və inzibati işə çox böyük ehtiyac var. Çox təəssüf ki, yol qəza
hadisələri çox olur, belə zamanda o qutular lazım ola bilər. Buna
görə də dərman qutularının olması məsələsi ilə bağlı ciddi
tədbirlər görülməlidir".