Hafiz Hacıyev:"Cəmil Həsənli səsini kəsməsə dozanı bir azda artıracağam"

"Mən hələ dozanı aşağı eləmişəm. Cəmil Həsənli səsini kəsməsə dozanı bir azda artıracağam". Bu sözləri ANS PRESS-ə açıqlamasında prezidentliyə namizəd, Müasir Müsavat Partiyasının sədri Hafiz Hacıyev bildirib. Partiya sədri qohumu Bəxtiyar Hacıyevin onun namizədliyinin ləğv olunması ilə bağlı verdiyi açıqlamaya sərt reaksiya göstərdi: "Bəxtiyar Hacıyev ruhi xəstədir. Müalicəyə ehtiyacı var. Çalışırıq ki, onu Türkiyədə, ya da Almaniyada müalicə etdirək. Mənim namizədliyimi heç kim ləğv edə bilməz. Buna ixtiyarları da yoxdur. Orda nə oldu ki?. Adi bir debat idi. Belə şeylər dünyanın hər yerində baş verir. Cəmil Həsənli yenə danışsa, onlar barədə daha kəskin faktları açıqlayacağam. Əlimdə hələ çox sübutlarım var".
Milli Şuranın prezidentliyə namizədi Cəmil Həsənlinin ünvanına sərt ifadələr işlədən Hafiz Hacıyev Müsavat və AXCP üzvlərinin əksəriyyətinin seçkilərdə ona səs verəcəyini iddia etdi: "Mən Xalq Cəbhəsinin üzvü olmuşam. Elçibəy komandasının ən layiqli naziri mən idim. Elçibəy məni baş nazir təyin eləmək istəyirdi. Amma həmin vaxt ABŞ-a Azərbaycana Ermənistanın hərbi təcavüzü ilə bağlı BMT-də 852 saylı qətnamənin qəbul olunması üçün getmişdim. Qayıdandan sonra, gördüm vəziyyət dəyişib. Xalq Cəbhəsinin fəallarından biri idim. Buna görə, cəbhəçilər və müsavatçılar mənə səs verəcək..."